छत्रपती शिवाजी महाराजांचा पोवाडा - महात्मा फुले भाग - 7 |छत्रपती शिवाजी महाराज यांचा पोवाडा | Chhatrapati Shivaji Maharaj Powada
छत्रपती शिवाजी महाराजांच्या कार्याची प्रेरणा घेऊन क्रांतीसुर्य महात्मा फुल्यांनी, त्यांचे चरित्र अशिक्षित लोकांना समजेल असे पोवाड्याच्या माध्यमातून लिहीले.
छ. शिवाजी राजांचा पोवाडा
शिवाजी तों मसलत देई मित्र तान्हाजीला ।
बेत छाप्याचा सुचवीला ॥
तान्हाजींने भाऊ धाकटा सोबत घेतला ॥
मावळी हजार फौजेला ॥
सुन्या रात्रीं सिंहगड पायीं जाऊन ठेपला ।
योजिलें दोर शिडीला ॥
दोरीची शिडी बांधली शिपाई कमरेला ।
हळुच वर चडवीला ॥
थोडी चाहूल कळली सावध उदेबानाला ।
करी तयार लोकांला ॥
थोडया लोकांसवें तान्हाजी त्यांवर पडला ।
घाबरा गडकरी केला ॥
रणीं तान्हाजी पडे मावळे पळती बाजूला ।
सूर्याजी येऊन ठेपला ॥
धीर मोडक्या देई परत नेई सर्वाला ।
उगवी बंधु सूडाला ॥
उदेबान मारिला बाकिच्या रजपुताला ।
घेतलें सिंहगडाला ॥
गड हातीं लागला तान्हाजी बळी घेतला ।
झालें दु:ख शिवाजीला ॥
सिंहगडीं मुख्य केलें धाकटया सुर्याजीला ।
रुप्याचीं कडीं मावळयाला ॥
पुरंधर माहूली घेई वरकड किल्ल्याला ।
पिडा जंजिरी सिद्दयाला ॥
सुरत पुन्हां लुटी मागीं झाडी मोगलाला ।
मोगल जेरदस्त केला ॥
कैद करी शिवाजी बाकी उरल्या फौजेला ।
त्यांमधीं अनेक स्त्रीयांला
सुंदर स्त्रीया परत पाठवी नाहीं भाळला ।
लाजवी औरंगजीबाला ॥
सरनौबत वीर पाठवी खानदेशाला ।
शुरु केलें चौथाईला ॥
जलदी मोगल धाडी मोहबतखानाला ।
देई मोठया फौजेला ॥
औढापट्टा घेऊन वेढी साल्हेर किल्ल्याला ।
धिंगाणा दक्षिणेंत केला ॥
गुजर उडी घाली सामना शत्रूचा केला ।
मोरोबा पठाण पंक्तीला ॥
लढतां पळ काढी दावी भ्याला मोगलाला ।
जसा खरा मोड झाला ॥
तों मराठे पळती मोगल गर्वानें फुगला ।
आळसानें ढिला पडला ॥
गुजर संधी पाहून परत मुरडला ।
चुराडा मोगलाचा केला ॥
बेवीस उमराव पाडले रणभूमीला ।
नाहीं गणती शिपायांला ॥
लहान मोठे कैदी बाकी सर्व जखम्यांला ।
पाठवी रायगडाला ॥
मोगल वेढा झोडून मार देत खबरीला ।
गोडबोल्या गोवी ममतेला ॥
एकसारखें औषध पाणी देई सर्वांला ।
निवडलें नाहीं शत्रूला ॥
जखमा ब-या होतां खुलासा सर्वांचा केला ।
राहिले ठेवी चाकरीला ॥
शिवाजीची कीर्ति चौमुलखीं डंका वाजला ।
शिवाजी धनी आवडला ॥
मोगल यवनी शिपायी सोडी चाकरीला ।
हाजरी देती शिवाजीला ॥
पोर्चुग्यास धमकी देई मागे खंडणीला ।
बंदरी किल्ला वेढीला ॥
मधींच इंग्रज भ्याला जपे मुंबे किल्ल्याला ।
बनया धर्मा आड झाला ॥
दिल्लीस परत नेलें सुलतान माजूमाला ।
दुजें मोहबतखानाला ॥
उभयतांचा बदली खानजाहान आला ।
मुख्य दक्षणेचा केला ॥
मोगलाला धूर देऊन लुटलें मुलखाला ।
गोवळकुंडीं उगवला ॥
मोठी खंडणी घेई धाकीं धरीं निजामाला ।
सुखें मग रायगडी गेला ॥
मोगलाचे मुलखीं धाडी स्वार लुटायाला ।
लुटलें हुबळी शहराला ॥
समुद्रकांठीं गांवें लुटी घेई जाहाजांला ।
केले खुलें देसाईला ॥
परळी सातारा किल्ले घेई पांडवगडला ।
आणिक चार किल्ल्यांला ॥
॥चाल॥
हुकूम विजापुरी झाला । सोडिलें बहुत फौजेला ॥
द्यावा त्रास शिवाजीला । घ्यावें त्याचे मुलखाला ॥
शिवाजी सोडी गुजराला । कोंडी आबदुल करीमाला ॥
केला माहग दाण्याला । शत्रु अती जेर केला ॥
आर्जव करणें शिकला । भोंदिलें सेनापतीला ॥
निघून विजापुरीं गेला । क्रोध शिवाजीस आला ॥
रागाऊन लिहिलें पत्राला । निषेधी प्रतापरावाला ॥
गुजर मनांत लाजला । निघून वराडांत मेला ॥
॥चाल॥
आबदुल्यानें । बेशर्म्यानें ॥
फौज घेऊन । आला निघून ॥
राव प्रताप । झाला संताप ॥
आला घाईने । गाठी बतानें ॥
घुसे स्वताने । लढे त्वेषानें ॥
घेई घालून । गेला मरुन ॥
प्रतापराव पडतां मोड फौजेचा झाला ।
पाठलाग मराठयाचा केला ॥
तोफ गोळया पोटीं दडती भिडती पन्हाळयाला ।
गेले नाहीं शरण शत्रूला ॥
अकस्मात हंसाजी मोहिता प्रसंगीं आला ।
हल्ला शत्रूवर केला ॥
गुजर दळ मागें फिरुन मारी यवनाला ।
पळीवलें विजापुराला ॥
शिवाजीनें हंसाजीला सरनौबत केला ।
मोठा अधिकार दिला ॥
हंबिरराव पद सोडलें त्याच्या नांवाला ।
शिवाजी मनीं सुखी झाला ॥
सेनापतीचे गुण मागें नाहीं विसरला ।
पोशी सर्वं कुटुंबाला ॥
प्रतापराव-कन्या सून केली आपल्याला ।
व्याही केलें गुजराला ॥
काशीकर गंगाभट घाली डौल धर्माचा ।
केला खेळ गारुडयाचा ॥
लुटारु शिवाजी लुटला धाक गृह फौजेचा ।
खर्च नको दारुगोळीचा ॥
बहुरुपी सोंग तूलादान सोनें घेण्याचा ।
पवाडा गातो शिवाजीचा ॥
कुळवाडी-भूषण पवाडा गातो भोसल्याचा ।
छत्रपती शिवाजीचा ॥7॥
छत्रपती शिवाजी महाराज यांचा पोवाडा भाग - 8 साठी येथे क्लिक करा!
छत्रपती शिवाजी महाराज यांचा पोवाडा भाग - 6 साठी येथे क्लिक करा!
छत्रपती शिवाजी महाराज यांच्या पोवड्याचे सर्व भाग साठी येथे क्लिक करा!
या लेखा मध्ये काही चुक झाली असेल तर खाली दिलेल्या E-mail वर आम्हाला कळवा.
जर तुमच्याकडील काही लेख, आंबेडकरी चळवळीतील काही माहिती , जुन्या भीम गीतांचे Lyrics किंवा काहीही Suggestion असतील तर आम्हाला Instagram वरती मेसेज करून किंवा inquiry@jaybhimtalk.in येथे क्लिक करून मेल करा. जय भीम
आम्हाला Instagram वर फॉलो करा!
आम्ही दिलेली माहिती आवडली असेल तर ती नक्की शेअर करून आम्हाला Support करा.
