छत्रपती शिवाजी महाराजांचा पोवाडा - महात्मा फुले भाग - 5 |छत्रपती शिवाजी महाराज यांचा पोवाडा | Chhatrapati Shivaji Maharaj Powada
छत्रपती शिवाजी महाराजांच्या कार्याची प्रेरणा घेऊन क्रांतीसुर्य महात्मा फुल्यांनी, त्यांचे चरित्र अशिक्षित लोकांना समजेल असे पोवाड्याच्या माध्यमातून लिहीले.
छ. शिवाजी राजांचा पोवाडा
सावंत पत्र लिही पाठवी विजापूरास ।
मागे फौज कुमकेस ॥
बाजी घोरपडा बल्लोळखान येती साह्यास ।
शिवाजी करी तयारीस ॥
त्वरा करुन गेला छापा घाली मुधोळास ।
मारिले बाजी घोरपडयास ॥
भाऊबंद मारिले बाकी शिपाइ लोकांस ।
घेतलें बापसूडास ॥
सावंताची खोड मोडून ठेवी चाकरीस ।
धमकी देई पोर्च्युग्यास ॥
नवे किल्ले बांधी डागडुजी केली सर्वास ।
बांधिले नव्या जाहजास ॥
जळी सेनापती केले ज्यास भीती पोर्च्गुगीस ।
शोभला हुद्दा भंडा-यास ॥
विजापूरचा वजीर गुप्त लिही शिवाजीस ।
उभयतां आणलें एकीस ॥
व्यंकोजी पुत्रा घेइ शाहाजी आला भेटीस ।
शिवाजी लागे चरणास ॥
शाहाजीचे सद्गुण गाया नाहीं आवकास ।
थोडेसे गाऊं अखेरीस ॥
सुखसोहळे झाले उपमा लाजे मनास ।
उणें स्वर्गी सुखास ॥
अपूर्व वस्तू घेऊन जाई विजापूरास ।
भेट मग देई यवनास ॥
पराक्रमी शिवाजी पाळी पाऊण लक्षास ।
साजे यवनी स्नेहास ॥
विजापूरचा स्नेह होता लढे मोगलास ।
घेतले बहूतां किल्ल्यांस ॥
सर्व प्रांती लूट धुमाळी आणिलें जेरीस ।
घाबरें केले सर्वांस ॥
संतापानें मोंगल नेमी शाइस्तेखानास ।
जलदि केली घेई पुण्यास ॥
चाकणास जाऊन दावी भय फिरंगोजीस ।
फुकट मागे किल्ल्यास ॥
मास दोन लढला घेऊन सर्व फौजेस ।
खान खाई मनास ।
आखेर दारु घालून उडवी एका बुर्जास ।
वाट केली आंत जायास ॥
वारोंवार हल्ले गर्दी करुं पाहे प्रवेश ।
शाईस्ता पठाण पाठीस ॥
मागें पळति सर्व कोणी मानिना हुकूमास ।
भीति आंतल्या मर्दास ॥
लागोपाठ मार देत हटवि पठाणास ।
खचला खान हिंमतीस ॥
प्रात:काळी संतोषानें खालीं केलें किल्ल्यास ।
देई मुसलमानास ॥
फिरंगोजीला भेट देतां खुषी झाली यवनास ।
देऊन मान सोडी सर्वास ॥
शिवाजीची भेट घेतां सन्मान दिला त्यास ।
वाढवी मोठया पदवीस ॥
फिरंगोजीचें नांव घेतां मनी होतो उल्हास ।
पीढीजाद चाकरीस ॥
येशवंतशिंग आले घेऊन मोठया फौजेस ।
मदत शाईस्तेखानास ॥
सरनौबत भौती लुटी नगरी मुलखास ।
जाळून पाडिला ओस ॥
पाठी लागुन मोंगल मारी त्याच्या स्वारांस ।
जखमा केल्या नेताजीस ॥
राजगड सोडून राहीला सिंव्हगडास ।
पाहून मोगलसेनेस ।
जिजीबाईचे मुळचें घर होतें पुण्यास ।
खान राही तेथें वस्तीस ॥
मराठयास चौकी बंदी गांवांत शिरण्यास ।
होता भीत शिवाजीस ॥
लग्नव-हाडी घुसे केला पुण्यांत प्रवेश ।
मावळ सोबत पंचवीस ॥
माडीवर जाऊन फोडी एका खिडकीस ।
कळालें घरांत स्त्रीयांस ।
शाइस्त्यास कळतां दोर लावी कठडयास ।
लागला खालीं जायास ॥
शिवाजीनें जलदी गाठूंन वार केला त्यास ।
तोडीलें एका बोटास ॥
स्त्रियपुत्रां सोडून पळे पाठ दिली शत्रूस ।
भित्रा जपला जीवास ॥
आपल्या पाठीस देणे उणें शिपायगिरीस ।
उपमा नाहीं हिजडयास ॥
सर्व लोकांसहित मारिलें खानपुत्रास ।
परतला सिंहगडास ॥
डौलाने मोंगल भौती फिरवी तरवारीस ।
दावी भय शिवाजीस ॥
समीप येऊं दिले हुकूम सरबत्तीस ।
शत्रू पळाला भिऊन मारास ।
करनाटकी बदली धाडी शाइस्तेखानास ।
मुख्य केलें माजमास ॥
राजापुरीं जाई शिवाजी जमवी फौजेस ।
दावी भय पोर्च्युग्यास ॥
सर्व तयारी केली निघाला नाशिक तीर्थास ।
हुल कसी दिली सर्वांस ॥
मध्यरात्री घेई बरोबर थोड्या स्वारांस ।
दाखल झाला सुर्तेस ॥
यथासांग साहा दिवस लुटी शहरास ।
सुखी मग गेला गडास ॥
बेदनूराहून पत्र आलें देई वाचायास ।
आपण बसे ऐकायास ॥
शिपायाचे बच्चे शाहाजी गेले शिकारीस ।
लागले हरणापाठीस ॥
घोडया ठेंच लागे उभयतां आले जमीनीस ।
शाहाजी मुकला प्राणास ॥
पती कैलासा गेले कळालें जिजीबाईस ।
पार मग नाही दु:खास ॥
भूमी धडपडे बैसे रडून गाई गुणांस ।
घेई पुढें शिवाजीस ॥
॥चाल॥
अतीरुपवान बहु आगळा ।
जसा रेखला चित्रीं पूतळा ॥
सवतीवर लोटती बाळा ।
डाग लाविला कुणबी कुळा ॥
सवतीला कसे तरी टाळा ।
कज्जा काढला पति मोकळा ॥
ख-या केंसानें कापि का गळा ।
नादी लागला शब्द कोकिळा ॥
मूख दुर्बळ राही वेगळा ।
अती पिकला चितेचा मळा ॥
झाला शाहाजी होता सोहळा ।
मनी भूलला पाहूनी चाळा ॥
बहुचका घेती जपमळा ।
जाती देऊळा दाविती मोळा ॥
थाट चकपाक नाटकशाळा ।
होती कोगळा जशा निर्मळा ॥
ख-या डंखिणी घाली वेटोळा ।
विषचुंबनी देती गरळा ॥
झाला संसारी अती घोटाळा ।
करी कंटाळा आठी कपाळा ॥
मनी भिऊन पित्याच्या कुळा ।
पळ काढला गेले मातुळा ॥
छातीवर ठेवल्या शिळा ।
नाही रचला सवत सोहळा ॥
॥चाल॥
कमानीवर । लावले तीर ॥
नेत्रकटार । मारी कठोर ॥
सवदागर । प्रीत व्यापार ॥
लावला घोर । सांगतें सार ॥
शिपाई शूर । जुना चाकर ॥
मोडक्या धीर । राखी नगर ॥
आमदानगर । विजापूरकर ॥
मंत्रि मुरार । घेई विचार ॥
वेळनसार । देई उत्तर ॥
धूर्त चतुर । लढला फार ॥
छाती करार । करी फीतुर ॥
गुणगंभीर । लाविला नीर ॥
होता लायक । पुंडनायक ॥
स्वामीसेवक । खरा भाविक ॥
सिंहगडावर गेला बेत केला क्रियेचा ॥
बजावला धर्म पुत्राचा ॥
रायगडीं जाई राही शोक करी पित्याचा ।
शत्रु होता आळसाचा ॥
दु:खामधी सुख बंदोबस्त करी राज्याचा ।
पवाडा गातो शिवाजीचा ॥
कुळवाडी-भूषण पवाडा गातो भोसल्याचा ॥
छत्रपती शिवाजीचा ॥5॥
छत्रपती शिवाजी महाराज यांचा पोवाडा भाग - 6 साठी येथे क्लिक करा!
छत्रपती शिवाजी महाराज यांचा पोवाडा भाग - 4 साठी येथे क्लिक करा!
छत्रपती शिवाजी महाराज यांच्या पोवड्याचे सर्व भाग साठी येथे क्लिक करा!
या लेखा मध्ये काही चुक झाली असेल तर खाली दिलेल्या E-mail वर आम्हाला कळवा.
जर तुमच्याकडील काही लेख, आंबेडकरी चळवळीतील काही माहिती , जुन्या भीम गीतांचे Lyrics किंवा काहीही Suggestion असतील तर आम्हाला Instagram वरती मेसेज करून किंवा inquiry@jaybhimtalk.in येथे क्लिक करून मेल करा. जय भीम
आम्हाला Instagram वर फॉलो करा!
आम्ही दिलेली माहिती आवडली असेल तर ती नक्की शेअर करून आम्हाला Support करा.
